Wy borgermeisteren, scepenen ende raede der stadt van Utrecht aen die een, ende wy borgermeysteren, scepenen ende raede der stadt van Wyck te Duerstede aen d’ander zyden, doen kond allen luden ende bekennen mit dese onsen brieve dat wy om meerre vruntscap mit malcanderen te hebben om vorderscap onser beyder borgeren ende ondersaten overcomen zyn zekere punten soe die hier nabescreven staen. In den yersten alle die borgeren, ondersaten ende inwoeners van beyden den steden die op malcanderen off tegens een te doen hebben van sculden oft anders ende enich op den anderen recht begeert off versoeckt den sal men tot alre tyt een onvertogen recht laten gescieden. Item soe wie van onsen borgeren oft ingesetenen lyfrenten oft erfrenten hebben nu ter tyt op enich van onsen steden te wetenen die borgeren van Wyck the Duerstede op Utrecht ende wederom die zellen te vreden zyn mytter betalingen in dien men hem soe veele jaerlicx aen gelde betaelt van hoer lyfrenten ofte erfrenten als men den ingeseten van elker steden betaelt mit overwisinge off mit scriften. Ende die betalinge sal men doende wesen altyt binnen een half jaer nae den verscenen termynen. Indien dat niet en gesciede soude die gene die in gebreke waer daer voer moegen besetten die borgeren van der ander stede ende hoeren live ende goede daervoer bespreken. Ende die alsoe besproken wert sell moegen binnen die yerste verthiendagen nae dat bespreken noch moegen betalen als voerscreven staet. Ende en geschiede dan die betalinge niet, soe moegen die aen den gebreke zyn hem behelpen mit haeren brieven ende men sal hem recht doen na grotingen ende vermogen der zelver brieven. Item men en sell gheen wthemsche toelaten oft vremde borgeren ontfangen die men recht doen zell van lyfrenten off erfrenten oft ander brieve die de steden voerscreven aengaen op enich van den steden borgeren 

lyff of goet. Mer waert dat yemant behylicten enige lyfrenten oft erfrenten off vercreech mit versterff die sal men betalen als voerscreven is. Ende dese enicheyt zell geduerende wesen een half jaer nae enich van der steden opscriven ende langer niet. Ende want wy aen beyden syden dese voerscreven overdrachte onverbreekelick gehouden willen hebben, soe hebben wy geloeft ende geloven elcx van onser steden wegen alle punten voerscreven ende elck bysonder elcx den anderen onverbrokelyck te houden als voerseyt is. Alle dinge sonder argelist. Ende dess t’oerkonde hebben wy hier van twee brieven alleens sprekende laten maken wthangende bezegelt mit onser steden zegelen der elck van ons steden een heeft. Gegeven ende gesciet int jaer ons Heeren dusent vierhondert drieendetnegentich des vrydages na Sunte Anthonis dach.