Wy Frederick, van Gots gnaden bisschop 't Utrecht, geboren marckgreve van Baden, maecken kont allen luden ende bekennen midt desen onsen brieve, alzoe by uns ende onsen Staten ene vuytsettinge beliefft ende vuytgestalt is tot betalinge des hertogen van Cleve daer onse ondersaten bynnen unser stadtvryheyt van Wyck geseten oeck toe gelden suden nae vermoegen der selver vuytsettinge. Ende want dan onse voerscreven stadt Wyck daerinne nyet heefft willen consenteren dan altyt daer tegens doen excipieren heefft voirnemende nae hoeren previlegien daer niet toe behoren te geven, doch nyet the myn ende onvercorttet hoire previlegien ende ons to eeren ende gevallen heeft onse stadt Wyck voerscreven ons daervoer ene schencke offte gunste gedaen van hundert ende tweendertich golden gulden van gewichte, vuyt gunsten ende nyet van rechts wegen, die wy geheelick ende all ontfangen hebben ende schelden hem daervan quyt midt desen onsen brieve. Gelovende voer ons ende onse nacomelingen bisschoppen 't Utrecht sy van der voerscreven vuytsettinge te ontheffen ende dat sy daerdoer in horen previlegien ende vryheyden onvercorttet zullen blyven ende in toekomende tyden nyet voer recht gerekent sall werden. Sonder argelist. In oirkunde 's brieffs bezegelt midt onsen zegell. Gegeven in onsen slote Duersteden in 't jaer onses Heren duysent vyffhundert ende thyen op ten yersten dach in meerte.