Wy Dirck van Oostrom, scout van weegen keyserlijke majesteit, Jan Heynricxz van Oemeren, Otto de Witt ende Wyer van Riebeeck, scepenen tot Wyck by Duersteden, maicken kenlick allen luyden dat op huyden datum 's brieffs voir ons gecomen ende gecompareert is in 't gerechte Jan Jansz van Mechelen hebbende blyckende geboorte by syn echte huysfrouw ende heeft aldair mit synen vryen moetwille voir hem, syne erffgenamen ende nacomelingen gerechtelick opgedragen ende overgegeven mit oirdel ende mit vonnisse alse die scepenen wesen dat recht was Peter Voss ende Cornelis Dircxz, potmeesters in der tyt ende hoeren nacomelingen den vryen eygendom van drie Karolus keysers gulden alse twyntich Hollandse gevalueerde stuvers voir elcken gulden voirscreven gereeckent off ander goet gevalueert Hollants payement dier weerden dair voir ganber wesende in der tyt der betalinge 's jaers erfflicke losrenthen gaende jaerlicx wt een hondt landts gelegen op Overnoorderweerdt, dair die heeren van Audemunster boven ende 't capittel bynnen Wyck beneden naest gelant ende geerft zyn, streckende van den wech daer men nae Riebeeck toe gaedt tot aen 't gasthuys tot Wyckslandt toe ende voorts wt alle syne goederen, roerende ende onroerende die hy nu ter tyt heeft ende namaels vercrygen sel moegen. Te betalen dese rente jaerlicx ende alle jaer op Meydach anno 1500 vyff ende vyftich naestcomende ofte bynnen die eerste veerthyen dagen dairnaest volgende onbegrepen. Ende soe voort jairlicx erfflick ende euwelick ter lossinge toe wtgenomen ofte die potmeesters voorschreven ende hoire nacommers sullen dese voorschreven rente nae den termyn moegen doen panden an dit voorschreven landt ende alle syne goederen ende mitte pande voirtvaren als recht is. Ende verteech hy comparant voorschreven van dese voorschreven rente tot behoeff die potmeesters ende hoeren

nacommers. Ende belooffden hy comparant voor hem, syne erffgenamen ende nacomelingen dese voorschreven rente te vryen ende te waren jaer ende dach ende ten euwigen dagen als erfflicke losrenthe recht is. Alsoe dat die scepenen wesen voir recht dat Jan van van Mechelen syne erffgenamen ende nacomelingen van dese voorschreven rente onterft syn ende dat Peter ende Cornelis voorschreven als potmeysters ende haren nacommers dairaen ende in geerft syn ende sullen blyven geerft mitten rechte ten eewigen dagen. Mit sulcke voirwaerden dat Jan van Mechelen voirschreven syne erffgenamen ende nacomelingen dese voirscreven rente 't allen tyden alst hem gelieven sal sal moegen vryen, lossen, quyten ende offigeren geheel ende al 't eennemael teffens mitte somme van vyftich derselver Karolus keysers gulden payements voorschreven ende mitten renten alsdan dairoff verschenen ende onbetaelt synde. Sonder arch ofte list. In kennisse der wairheyt ende vasticheden 't gundt voorschreven is, soe hebben wy scoudt ende scepenen voirgenoemd elcx onsen segels beneden aen desen brieff wtgehangen. Gegeven in 't jair ons Heeren als men screeff duysent vyffhondert vyff ende vyftich op ten vyftienden dach van januarie.