Wy Heynric Stael, rechter, Vrederic Bac, Jan Stael ende Dirc die Rughe, scepen in der Ameyden, orconden dat voer ons quam in ’t recht Herbaren Clonckaerts ende gaf met hoers voechts hant die hore die rechter gaf met recht Aelbert Stael enen eyghendom van den eenre helft van den goede daer si in bestorven is met haren kinderen van Claes Bindelmaer ruerende van huse ende van hofstat also als ’t geleghen is benedendams over die nuwe graft watter beter is dan tsheren thijns daer aen die een side noerdenwaert naest gelegen is Jan Scaep metter Poertgraft ende aen die ander side sudenwaert naest gheleghen is aen hofstat Hughe Janssoen. Voert soe verteech Herbaren met hoers voechts hant voerscreven in behoef Aelberts voerscreven op dit deelhuus ende hofstats voerscreven met allen recht dat die scepene wijsden dat recht was. Voert so lovede Herbaren met hoers voechts hant voerscreven den voerscreven Aelbert alle voercommer of te doen van desen deelhuus ende hofstats voerscreven dien scepene kennen dat si sculdich is of te doen. Ende dit ’s gesciet met allen recht dat die scepene wiisden dat recht was. Bezeghelt met onsen zeghelen. Ghegeven in ’t jaer ons Heren dusent driehondert acht ende tachtich des dinxdaghes nae ’t sheylichs cruusdach inventio.