Wy Wouter heren van Ysenderen ridder, richter in der Neder Betue, oerconden ende tughen openbaerliic dat vuer ons ende vuer gherichtslude hier beneden bescreven quam alse in gherichte Alart Stevens soen ende gaf ende droech op mit sinen vryen wille Zacheriis Zeghers soen vyf merghen lants ende twe hont lants in der maelscaep van Ravezwade gheleghen in steden hier beneden bescreven in 't ierste twe merghen lants ende een hont lants te gueder maten in den Peperkoeke gheleghen daer doe Coegrave boven naest ghelant ende gheleghen is van der eenre sinde ende her Lambert Want beneden van der ander siden ende vuert drie merghen lants ende een hont lants in der selven Peperkoec gheleghen daer Zacheriis vuerscreven boven naest ghelant ende gheleghen is van die eenre siden ende Peter die Zwarte beneden van der ander siden alse vuer een vry eyghen erve in gherechten eyghendoem, eggen ende eynden, mit all haren toebehoeren in allen manieren dat sii gheleghen siin vryelyc ende erffeliic hoem te behauden ende te besitten ende verteech daer op nae alse hii sculdich was te doen alsoe dat vonnis ende oerdel wiisde ende rechte was dat hii daer af onterft waer ende daer niet mer rechts toe te seggen en hadde noch en behielde noch siin erfname. Ende dat Zacheriis Zeghers soen vuernoemt daer aen gheerft ware ende hoem vast ende stede waer [ende?] hoem noch sinen erfnamen nyemant braken en soude noch en muchte mit enighen rechte hier toe gheloefde Alaert Stevens soen vuerscreven Zacheriis Zeghers soen vuerscreven alle des vuernoemden lants ende erfs te waren jaer ende dach alse erfscops rechts is in [...] vuer alle die gene dyes ten rechte comen willen allen vuercommer ende vuerplchten af te doen ende alle den ghene daer op hoem [......] daer mit rechte op sculdich siin te ver[...] Hier over waeren gherichtslude Daem van Nyemantsvrient, Dirc van der Wuert Reynouts soen 

ende anders [...] lude. In orconde des briefs beseghelt mit onsen seghele. Gegheven in 't jaer ons Heren dusent driehondert een ende tachtentich des manendages in der vasten na den sonnendach alse men singt Reminissare.