Ic Jan van Bueren Gherytsoen bekenne ende lye mit desen openen brieve voir my ende voir minen erven dat ic claerliken ghesceyden bin ende wtghegoet van allen goeds dat my van minen vader of mynre moeder ter ierster doet van hem beyden aen comen mach mit enen stuck lands dat gheleghen is in den Middelweert, streckende wt der Leck op aen Ghysberts lant van Bronchorst toe daer boven naest gelant die papelike proven van Ravenswade ende beneden naest ghelant Herman van den Velde ende ghelove voir my ende voir myn erven in goeden trouwen ende by mynre eren dat ic minen vader noch mynre moeder, mynen broederen noch mynre zuster aen horen goeden in gheenrewys hynder noch aenspraec doen en sal ter ierster doet van vader of van moeder, onser broederen ende suster voirscreven. Voirt so syn ’t voirwairde waert sake dat myn vader of myn moeder, broeders of zuster tot enighen tiden myns te doen hadden aen enighen goede dat sy vercopen of versetten mosten dat ic dan bereet ende willich wesen sal daerop te vertyen ende over te gheven mit hande ende mit monde tot horen wil wt ghenomen alle arghelisten. In kennisse der waerheit so heb ic minen seghel aen desen brief ghehanghen ende om der meerre vestenise wil so heb ic ghebeden Herman van den Velde, minen broeder, ende Jan van Wely, minen neve, dat si desen brief mede mit my beseghelen willen. Ende wy Herman van den velde ende Jan van Wely om beden wil Jans van Bueren, ons broeders ende neven voirscreven, ende want ons dese voirscreven sceydinge kondich is ende hiermede ghe[… ….] so hebben wy desen brief mede mit onse seghel beseghelt tot enen ghetughe alle [….] Ghegeven in ’t jaer ons Heren dusent vierhondert neghen ende twyntich des dynxdaghes na Sunte Valentynsdaghe.