Ic Jan van Ouwyck, amptman in Nederbethue, orkonde ende tughe mit desen openen brieve dat voir my ende voir gherichslude beneden ghescreven comen is Gheryt Holl Gueders zoen ende gaff over ende droech op mit sinen vryen wil Gheryt van Eck Dirxsoen elf hont lands ende erfs luttel min off meer ter goeder maten, gheleghen in der mailscap van Ravenswade, daer zuidwaert naest ghelandt is Sunter Claes, noerdwaert die heren van Sunte Merten, streckende van der Weteringhe op aen den Buerenschen grave, mit egghen, mit eynden ende mit allen sinen toebehoren, als dit voirscreven lant ende erve gheleghen is voir een goet, vry, eyghen erve. Ende Gheryt Holl voirscreven verteech daernae op als recht was van allen rechts ende toezegghens dat hy had off hebben mocht aen dit voirscreven lant ende erve in enigher wys, also dat vonnisse ende ordel der gherichslude wysden dat hy daer aff onterft waer ende syn erven ende nacomelinghen tot ewighen daghen ende dat Gheryt van Eck voirscreven daeraen gheerft waer ende syn erven ende nacomelinghen ende bliven sellen tot ewighen daghen ende dat hem des niement breken en sal noch en mach in gheenre wys mit ennighen recht wtghenomen alle arghelist. Daer dit geschiede waren over als gherichslude Roelant van der Eem ende Henric Bor Jans zoen ende meer goeder mannen. In orkonde des briefs open bezegelt mit minen zeghel. Ghegeven in ’t jaer ons Heren dusent vierhondert ende ses ende dertich op Onser Liever Vrouwenavont te Lichtmisse.