Allen den ghenen die desen brief sullen sien off horen lesen doe wy verstaen Geryt van Eck Dircs soen ende Roelant van der Eem Roelofs soen, kennen ende lyen mit desen openen brieve dat wy vercoft hebben mit onsen vryen wille, mit ghesamenderhant elc voir al Geryt van Bueren Gerytsoen elff hont lands ende erfs luttel min off meer ter goeder maten, ghelegen in der maelscap van Ravenzwade, streckende van der Buerweteringe van Ravenzwade op aen lant van Bueren toe daer zwtwaert naest ghelant is Sunter Claes, noertwaert naest ghelant syn die heren van Sunte Merten, om een somme van gelde welke somme gelts ons Geryt van Bueren voirscreven vol ende alle wael betaelt heeft tot onsen wille, den lesten penninc mit den iersten, ende bedancken hem daer aff alle goede betalinge. Voirt soe gheloven wy Gheryt van Eck ende Roelant van der Eem voirscreven voir ons ende voir onsen erven wy Heinric van Weze ende Gheryt van Eck Lamphollen soen gheloven mede mit Geryt van Eck Dircxs soen ende mit Roelant van der Eem voirscreven voir ons ende voir onsen erven mit ghesamender hant elc voir al als goede erfwaerborgen Geryt van Bueren voirscreven off syn erven, ghebraeck syns, dit voirscreven erve te waeren voir een vry, eyghen erve een ewich erffwaer te wesen als erffcoeprecht is in Nederbetue ende al hulde ende voircommer daer aff te doen voir allen den ghenen diest ten recht comen willen ende mede daer op doen te 

vertien alle die ghene die daer mit recht op sculdich syn te vertien. Alle dese voirscreven voirwaerden ende punten gheloven wy zaecwolden ende borgen voirgenoemd voir ons ende voir onsen erven Gheryt van Bueren voirscreven off syn erven, ghebraec syns, off den houder des briefs mit sinen wil in goeden trouwen by onser eren al wael te houden ende te voldoen ende niet te verbreken noch te wederseggen in gheenrewys, wtghenomen al argelist. In kennisse der waerheyt soe hebben wy zaecwouden ende borgen voirgenoemd desen brief open besegelt mit onsen segelen. Ghegeven in ’t jaer ons Heren dusent vierhondert acht ende dertich op ten lesten donredach voir Sunte Mergrietenavont virginis.