Alle die ghenen die desen brieff zullen sien of horen lesen doe wy verstaen suster Jutte Kyevits, priorinne ende dat ghemeen convent van Sunte Marien Magdalenen cloester tot Wyck by Duersteden dat vy hen ende kennen voer ons ende onsen nacomelinghen dat vy tot enen enighen erfpacht wt ghegheven hebben Dirc Villam Roloffssoen een husinghe aen drien cameren nu der tyt gemaect, gheleghen in der poerten van Wyck op dat Over bider Lutterpoert daer op die nortzide naest gheleghen is Herman Baers husinghe ende hofstede ende aen die zuitzide leit naest gheleghen Weym Lampen husinghe ende hostede, streckende van der poirte erve mitten anderen eynde after aen Aernt Vembertsoenes husinghe ende hostede alle iaer ewelick ende erffelick voer enen goeden halven gouden Vrancricsche scilt of payment tot synre veerden in der tyt der betelinghe. To betalen alle jaer op Sunte Mertyns dach in den vynte of binnen viertien daghe daer nae onbegrepen soe dien scepen brief daer af inhout die wy van Dirc voerscreven daer aff hebben ende behoudelike altyt Jans van Wyck syns pachs die hy jaerlyx wt der hostede heeft daer die voerscreven cameren op staen ende alle argelist ende niwe vonden weghe scaiden. Des tot enen oerkonde der waerheit so heb ic pryorinne voerscreven myn ambochs seghel van dese ghemenen convents weghen an desen brief ghehanghen. Ghegheven in den jaer onses Heren 1400 ende 44 op Sunte Mertyns dach in den vynter.