Wy Jan Dircksoen, richter, Johan Spruyt ende Jan Heinricksz, scepenen tot Wyck, doen kont allen luden dat voer ons quam in ’t recht voerscreven Dirck Willam Roelofszsoen mit Margriet siin wyff ende droegen op ende gaven over voer haer ende haren eerffgenamen mit haren vrien moetwille, mit oerdel ende vonnisse alse die scepen weesen dat recht was, behiltelick voerplichten ende scepenbrieven haers rechts Jan Ghysbertsz haren swager ende siin eerffgenamen den eygendom van alle recht ende toeseggens als sy in eniger wys hebben mogen aen den eerffpacht van eenre hofstede mit alsulck getymmer als daer op is ende leyt by die Leutertoern, daer den poert eerff van Wyck op die een syde ende Harman Henricksz nu ter tyt op die ander syde naest gelant leyt, streckende van Steven die Backers hofstede tot Herman Stevensz ende Wouter van Driell eerff toe. Ende Dirck mit Margriet siin wyff vertegen ter selver tyt mede voer haer ende haren eerffgenamen op desen voerscreven eerffpacht tot behoeffs Johan Ghysbertsz haren swager ende siin eerffgenamen also dat die scepen weesen dat Dirck ende Margriet ende haer eerffgenamen voergenoemd claerlick ende al daer off onteeerft siin ende dat Jan Gysbertsz ende siin eerffgenamen voergenoemd daer aen geerft siin ende bliven sellen mit recht sonder argelist behiltelick onsen heer van Wyck ende Duersteden siins scouts ende siins rechts. In oerkond des brieffs bezegelt mit onsen zegelen. Gegeven in ’t jaer ons Heren duusent vierhondert sessendetsoventich op ten twalefsten dach in junio.