Wy Jacop Peterssoen, richter, Jan Heinrickssoen ende Ghysbert Dirckssoen, scepen tot Wyck, doen kont allen luden dat voer ons quam in ’t recht Jan Gysbertssoen ende droech op ende gaff over myt vryen moetwillen, mit oerdel ende vonnisse alse die scepen wysden dat recht was, behiltelick scepenbrieff ende voerplichten haers rechts Harman Stevenssoen den Backer den vryen eygendom van enen eerffpacht van huusingen ende hofsteden begrepen, gelegen ende bepaelt als die brieff wtwysende siin daer desen tegenwoerdigen brieff is doer getransfixiert. Ende Jan Gysbertsz voergenoemd verteech ter selver tyt mede voer hem ende siin eerffnamen op desen eerffpacht ende mede van allen brieven daer off sprekende tot behoeffs Harman Stevensz voerscreven ende siin eerffnamen also dat die scepen weesen voer recht dat Jan Gysbertsz ende siin eerffnamen voerscreven van desen voerscreven eerffpacht onteerft siin ende dat Harman Stevensz ende siin eerffnamen voerscreven daer aen siin geerft ende sullen blyven geerft mitten recht sonder argelist, behiltelick onser heer van Wyck siins scouts ende siins rechts ende dat cloester tot Wyck ende Dirck van Wyck hoers pachts. In kenniss der waerheit bezegelt mit onsen zegelen. Gegeven in ’t jaer onses Heren duysent vierhondert eenendetnegentich op ten tienden dach in september.