Ic Jan Loeff doe kondt ende bekenne mit desen apenen brieve voir my ende voir mynen erven dat my alse Aerndt van Bueren, Barthout van Heteren ende Goert Ottensz voir my ende mit my gesegelt ende getaeft hebben voir een som geldtz van hondert Rynssche gulden currendt aen handen Mergriet, weduwe selve Hermans van Lewen in behoeff Mechtelt hoerre dochter, dair den taeldach aff is op Sunte Mertynsdach in den wynter alrenaist toecmende na datum dyss briefs off die voirscreven som geldtz sall staen dair vier jairen lanck vry rente als van theenen een. Weert nu sake dat dese selve Aerndt, Bartout ende Goert voirscreven off horen erven, gebraick hoerre, by deser voirscreven gelaeften tot eniger tyt in enigerwys enigen hynder, ankost, scade, last, [...] cregen off leden off dairvan deden dat gelove ick Jan voirscreven hem altyt te gelden ende te betalen my op te rechten tot hoes selffs sympel seggen sonder ede ende dair geeheel vol ende al scadeloos van te houden by derselver penen. In manyre ende pandinge nae inhout ende vermogen des hoefftbrieffs dair [...] voir gescien en sal van my off mynen erven mit genen rechten Sonder all argelist. Dyss to orkonde ende getuichnisse der waerheit so heb ic Jan Loeff voirscreven mynen segel aen desen brieve gehangen. Gegeven in 't jair ons Heren dusent vierhondert soeven ende tachtentich op Alresielendach.