Ic Gheryt van Noey beken voer my ende myn eerffnamen dat Margriet Cornelis Willamsz wedue ende haer eerffnamen ende nacomelingen vry hebben ende besitten sellen ten ewygen dagen toe durende die camer mitter hofstede so groet ende cleyn als wy die gesceyden hebben, staende aen die Stroeystraet, streckende aen Gysbert Dircksz nacomelingen eerff, daer ick Geryt voerscreven op die een syde ende Geryt Heymericksz op d’ander syde naest siin gelant. Sonder enich pacht off renten daeraff te gheven ende te betalen jaerlicx want ick ende myn nacomelingen sellen desen selven pacht betalen wt myn huusinge ende hofstede hier besyden naest gelant ten ewygen dagen durende. Ende ick Geryt voerscreven beken voer my ende myn eerffgenamen dat Margriet voerscreven hier off myn vervolcht, voldaen ende betaelt heeft tot mynen wille den laetsten penninck mitten yersten dats nu genuget sonder al argelist. In kennisse ende oerkond der waerheyt ende want ick Geryt van Noey voerscreven op dese tyt gheen zegel en heb, so heb ick gebeden Jacop die Roey Petersz desen brieff over my te bezegelen. Gegeven ende gesciet in den jaren ons Heren duusent vierhondert seven ende tnegentich des derden dages in den aprill.