Ic Splinter van Rossem doe cond ende kenlic allen luden dat is opghecome bin voer minen lieven heer heren Ghisebert heer van Vyanen ende van den Goye ende voor siin manne die hierna bescreven staen ende hebbe hem opghedraghen en quytghescouden alle recht ende toesegghen dat ic hebbe of hebben mach an den tyende van neghen hoeven lands op Raven also alse hi gheleghe is mit al zinen toebehoren op die weestzyde van den Ryn onder Utrecht, ende hebben op verteghen mit allen den recht also die manne wiisden dat recht was, soe dat icker gheen recht noch toeseggen an en behielt. Ende myn lieve heer van Vyanen voerscreven zinen vryen wil daermede doen mochte. Wulken tyende voerscreven Fye Maesdochter over Ryn? quam [...] minen lieven heer van Vyanen voerscreven ende voer siin manne ende verzocht desen tyent voerscreven die huer aenghecomen was van Maes [...] Roederics soen of van Dirc zinen brueder kuer huere aen in lesten live ghebleven was hier[...] rechtevoert belenede ende verheren min lieve heer van Vyanen voerscreven Fyen voerscreven desen tyende voerscreven tot allen rechte behoudelic minen lieven heer van Vyanen voerscreven ende een ieghelic siins rechts. Rechtevoert doe dit ghedaen was doe droech op Fye voerscreven minenlieven heer van Vyanen voerscreven ende scout quyt desen tyende voerscreven ende alle rechts ende toesegghen die si daeran heeft mit hueren ghecoren voocht alse Splinter van Rossem huer manede? alse die manne wiisden dat recht was die miin lieve heer van Vyanen voerscreven Fyen voerscreven ghestedicht hadde mit allen den rechte dat die manne wiisden dat recht was. Doe dit al ghedaen was doe belenede ende verliede mi miin lieve heer van Vyanen voerscreven om bede wil Fyen voerscreven desen tyende voerscreven behoudelic minen lieven heer van Vyanen voerscreven ende een ighelic siins rechts. Wulken tyende voerscreven ic mynen lieven heer van 

Vyanen voerscreven op ghedraghen hebbe ende quyt ghescouden alse miins lieven heren manne van Vyanen voerscreven wysden voer recht [...]gheliic voerscreven staet. Ende ghelove in goeden trouwen voer miin ende mynen erven [...] lieven heer van Vyanen voerscreven ende zinen erven of [...] dyen desen tyende voerscreven beleent ende verlyet of den [...] nommermeer [...] noch [...] daeran te doen noch te doen doen of iemant van onsentweghen. In kennisse der waerheit soe hebbe ic Splinter van Rossem voerscreven desen brief bezeghelt mit minen zeghel. Ende om der mere vestenisse ende zekerheit soe hebbe ic ghebeden miins lieves heren manne van Vyanen voerscreven alse Hubert Voerns soen ende Elyaes van Werconden desen brief mit mi ende over mi te bezeghelen. Ende wi Hubert Voerns soen ende Elyaes van Werconden om bede wil Splinters van Rossem voerscreven soe hebbe alse manne ons lieves heren van Vyanen ende van den Goye voerscreven desen brief mit hem ende over hem bezeghelt mit onsen zeghelen tot eenre rechter orkonde. Want wi hier over ende aen gheweest hebbe alse manne ons lieves heren van Vyanen ende van den Goye voerscreven. Gegheven in 't jaer ons Heren dusent driehondert acht ende tachtich op ons Heren Hemelvaertsavont.