Wij Antonis Jacopsz van Covelens, richter, Willam van Riebeeck, Steven Robben ende Jan Henrickxsz, scepen tot Wyck, doen kondt allen luden dat voir ons syn gecomen int gerecht Gerrit Jansz ende Jacopgen syn echter huysvrowe myt haer man ende mombers hant ende droegen tesamen gerechtelick op ende gaven over myt haeren vryen moet wille myt oirdel ende myt vonnisse alse die scepen wijsden dat recht was Cornelis Willamsz ende synen erven den vryen eygendom van eenre huysinge ende hofstede staende bynnen Wyck by die oude rosmuelen, streckende aen der poert eerff daer noertwert Goert die Kock ende zuytwert Hans Coen ende Claes Goessensz naest syn gelegen. Te gebruken ende the hebben in enen ewygen erffpacht Cornelis ende synen erven voirschreven voir vier gouden hertoch Philips gulden vyff en twintich Badense braspenningen off brabants stuver voir den gulden gerekent off ander goet payment dier werden dat daer goet voir is in der tyt der betalinge. Ende Cornelis voirschreven gelovede voir hem ende voir synen erven Gerrit Jansz ende Jacopgen syn huisvrou ende haeren erven dese voirgenoemde vier gulden jaerlix te betalen in die heylige dagen van Paesschen off bynnen die yerste vertien dagen daer naestvolgende onbegrepen offte Gerit ende Jacopgen off haeren erven voirschreven sullen dese voirgenoemde renten vanden erffpacht mogen panden nae den termyn aen dese voirgenoemde huisinge ende hofstede ende aen allen dat sy daer in ende op vinden ende myt die pande voirt varen als dat recht is. Ende Gerit ende Jacopgen geloveden voir haer ende voir haeren erven voirschreven Cornelis ende synen erven voirschreven dese voirgenoemde huusinge ende hofstede te vryen ende 

te waren jaer ende dach als eerffpachts recht is op dese voirschreven vier Philips gulden nae ende alle ander voircommer off te doen. Also dat die scepen wesen voir recht dat Gerit ende Jacopgen ende haer erven voirschreven daer off onterfft syn ende dat Cornelis ende sinen erven voirschreven daer aen geerfft syn ende sullen blyven geerfft mitten recht ten ewygen dagen toe sonder argelist. In kennisse der waerheyt soe hebben wy richter ende scepen voirgenoemd onse zegelen aen desen brieff gehangen. Gegeven int jaer ons Heren dusent vyffhondert drie en twintich den vierden dach van september.