Op condicyen ende voirwaerden nabescreven willen die burgemeesteren ende scepenen mit die acht raden ende sestyen borgeren verhueren der Stadt Meent voor die Rijnpoert gelegen dre jaren lanck gedurende tot notelicke defentie der gemeen borger vriheyt hoir recht daer mede te defenderen.

Inden eerste willmen die selve Meent verhuyren in alsulcker manyeren als Jacob van Riene de gehadt ende gebruyct heeft den tijt van dre jaren als voren ingaende Petri ad Cathedram anno LVII toecomende.
Item den huerman sal gehouden weesen de selve Meent te beheynen op sijne cost ende gehouden te weesen twe hecken te houden waer die twe poertyren elcx een slutel aff hebben sal.
Ende so wye aende slach ende huyr blijft sal gehouden weesen opteleggen ende te betalen de leste pacht van stonde aen by executie ende condemnatie.
Item den huyrman sal gehouden wesen te stellen twe goede geerfde borgen welcke borgen geloven sullen als principael tot kuer vande stadt te betalen, bij condemnatie ende executie als voren.