Den 5^e meij 1580, den schout, burgemeesteren ende schepenen doen te weten dat alle hair burgers, borgeren ende inwoenders tzij mannen ofte vrouwen nijmant des snachts herbergen ofte logeeren en sullen off sij leveren in handen vanden schout te negen uren des avonts die namen vanden selven gelogeerden met haren toenamen op een peene van dertich stuvers telcken reijse, ’t een derdendeel tot prouffijt vanden armen, twede derdendeel tot prouffijt vanden officier die d’executie doen sall ende het leste derdendeel tot prouffijt vanden stadt.

Item hebben mede geordonneert dat eenen ijgelijcken sijn wacht waernemen ende hem aldaer ijchtich holden sall op den boete volgende voorgaende politie, Aldus gepubliceert bij Henrick Holl, duerweerder den achten dach in meij vijfthien hondert tachtentich.

Op den 10^en meij 1580 my hoff scholtis, borgemeesteren, schepen, raden Henrick Lijster, Gerrit Vastrick, Gerrit van Esvelt, Jan Gerritsz, Henrick Jacobsz snijder, Cornelis Thonisz.
Is geordonneert dat men den coster vander kercke die sleutelen affnemen sall omme die kercke toe te mogen blijven ende dat omme te schouwen allen incomenden die dair vuijt rijsen moegen ter tijt anders dair inne geordonneert sij ende den coster geinterdiceert van nu voortaen nijet meer te luijden ter missen ofte vesperen ofte tot geenen diensten opte verbeurte van sijn officie ende borgerschap.
Den 16en meij 1580 heeft Wouter Henricksz coster sulcx [^onzekere lezing] belooft bij provisionele eedt t’onderhouden ende hem dair op die slotelen gelaten.