Eodem die is geordonneert dat den pater van sinte Agnieten vuijten conventen binnen Rhenen vertrecken sall die stadt van Rhenen ende vrijheijt vandien binnen den tijt van drije dagen naer insinuatie van desen op peijne van twintich gouden realen.

Den 3^en julij 1581 presentibus scholt, beijde borgemeesteren, schepenen Bock, Sander Jansz, Ulrich, Vonck, mr. Jacob Vonck, jonge Keijser, raden Henrick Lijster, Henrick Jacobsz snijder, Esvelt, Reijer Jansz.
Is geordoneert dat den magistraet selffs sall zijn present mette kerckmeesteren int affsetten vanden beelden ende schoemaken vanden kercken.

Item den kerckmeesteren sullen opsicht nemen ende acht slaen op all het geene datmen nutten ende oirbaren can ten eijnde tselve nijet vernijelt ofte verbracht en wort.
Item datmen nijet en sall affdoen dan alleen tgeene bijden magistraet ende kerckmeesteren geordonneert wort ende die dair en boven doet sal men straffen arbitralick.
Frans vander Waij, camerair kerckmeester, verclaarde dat hij op huijden begeert hadde den sleutelen vanden kercke vanden huijssfrouw van Wouter Henricksz, coster, ende oick van tolij kelderken die hem ter antwort gaff dat en sult ghij noch nijmants crijgen.
Item de selve huijssfrouw ontboden sijnde opten stadthuijse ende aldair van hair begeert bijden gerechte d’voorschreven sluetelen te leveren refuseerde tselve.

Den 5^en julij 1580 presentibus schout, burgemeesteren, schepenen, Sander Jansz, Bock, Ulrich, Vonck, mr. Jacob, jonge Keijser, raden Henrick Lijster, Reijer Jansz, Esvelt, Henrick Jacobsz snijder, Gerrit Vastrick en borgeren Keijser, Frans Verwaij ende Joachim Stevensz.
Is geordonneert dat Frans Verwaij kerckmeester den voijrluijden tot sestien toe elcx betaelen sall van kercke wegen negen gulden die die van Utrecht getimmert hebben.
Item dat hij die van Utrecht tot een proxyme [^onzekere lezing] schencken sal vijff ende twintich daelder tot 30 stuivers tstuck voor hunlieder assistentie.