laeten malen) gheven sullen in handen vanden portiers ende die binnen der stadt malen zullen dzelve verhandtreijcken die stadmollenaer ende dit op peijne van te verbeuren het coorn mitsgaeders die boete van ses carolus guldens vermogens die ordonnantie daer van zijnde, voirts interdiceren ende verbieden dvoirschreven regierders die mollenaers dat sij gheen sacken met coorn op hair molens sonder brieffkens zullen ontfangen op peijne van vijftich carolus guldens volgende dvoirschreven ordonnantie daer van zijnde. Aldus gepubliceert opten stadthuijse alhier nae voergaende clockluijdinge met assistentie vanden schoudt ende enige van dese gerechte. Actum den 5^en octobris anno 1584.

In vorwaerden ende maenieren naebeschreven soe willen die schoudt, borgemeesteren ende schepenen tot Rhenen verpachten die stadts excijsen den meesten daer voir biedende mitten excijs opt veer mitsgaeders die excijsen vanden brandewijn ende wijnedick volgende voirgaende accoert bijde gemeijn politie daerbij vougende, dat een pijp jopenpiers verexcijst sall worden op sestien stuvers, andere bieren van over sede op 8 stuivers elcke tonne ende een canne brandewijns op een halffve stuver, een aem Rijnsche wijnedick op thien stuvers ende binnen lantsche bieren buijten die jurisdictie van Rhenen gebrauwen op seven stuvers, ingaende op morgen, weesende den 10^en octobris 1584 ende duirende tot huijden desen dach over een jaer, te weeten totten 10^en octobris 1585.
Item die pachters der selver excijsen sullen gehouden wesen van stonden aen te stellen twe goede geerffde borgen die gesamender handt geloven zullen een voir all sonder ijmandt met zijn aendeel aff te moegen ten allen quater tempers te betalen.

Item off die excijsmeesters ten allen quater tempers vanden brouwers, tappers ofte inwoenders geen betalinge en cregen, zoe moeghen sij hair schulden executeren op sulcke recht als die stadt op hair heeft ende soe cameraer die stadts schulden inne windt.