Opt twede articule zijn die regierders geresolveert dat daer in besien zall worden nair behoiren.
Ten anderen omme te versien datmen generalick mach rond doen  omme die gansche vesten

Opt darde datmen die hopluijden gheen cruijt, noch lonten zall vuijtreijcken dan in tijt des noodts, soo    
sall het soe wel die soldaeten als die borgerije vuijtgereijckt worden
Ten  3e omme te moegen voer die soldaeten ontfangen cruijt ende  lonten

Opt vierde datmen een corte garde sall maecken achter Jacob van Rhenens te weten onder in   
Thijmens toern ende noch een tegens het school over  
Ten 4e omme te visiteren die cortegarden op dat die bequaemelicken gestelt moegen worden

Opt vijffde sijn die voirschreven regierders geresolveert dat sij daer regardt in ende op sullen hebben                   
Ten vijffde te disponeren vanden ghene die ons niet toe gedaen en zijn wie datmen ons daer inne zall hauden tsij papen ofte  anders

Opt seste articule sijn die regierders geresolveert, dat sij een missijffve aen mijn edele heeren die Staten sullen scrijven omme ammonitie te moegen vercrijgen          
Ten 6e datmijn heeren zall believen nevens ons te solliciteren dat die stadt tot behoeff der borgerije ende soldaten extraordinaris in tijts des noots met ammonitie versien warden

Opt het sevende ende leste articule refereren hem dregierders tot het darde articule       
Ten sevende ordonnantie van mijn edele heeren om ordinaris amonitie voer ijder compaignie soe wel voer ons als andere die in de stede van Rhenen moegen comen ter maent ofte ten 14e daegen sulcx mijn edele heeren zullen believen t’ordonneren

Aldus geresolveert presentes schoudt, borgemeesters, schepenen omnes, exceptis Frans Verwaij en Gerrit van Hees, raiden, Arien Dijrcxs, Jeriphaes van Triest, Wauter Verwaij ende Gerrit Loot. Actum op date ende jaere alsvoiren.