presenteert versoickende, dat Jan Ludolffss haer kijnderen soude moegen leeren leesen ende scrijven, hebben die regierders voergemelt (nae dat zij den ordinaris schoelmeester daer op gehoirt hadden) geconsenteert ende consenteren bij deesen, dat dvoirnoemde Jan Ludolffss tot twintich borgers meeskens int getall maer meer niet zall moegen leeren leesen ende scrijven mits dat de borgers ende ouders der voorschreven kijnderen gehouden zullen wesen te betaelen het ordinaris schoelgelt ende voerseijde schoelmeester in alder maeten off haer kijnderen bijde zelve schoelmeester ter scholen frequenteerden.

Zijn voirts geresolveert, dat men de gemeijnt Achterberch dwelck Stip lest in pachte gehadt heeft als oick het erffken twelck Willem Thoniss lest gebruijct heeft op sonnendach eerstcomende binnen Rhenen ende Venendael zall doen veijlen om dzelve te verhuiren den meesten daer voer biedende nae alsucke vorwaerden als bijde magistraet daer van geconcipieert ende gemaect zullen worden ende dat men bij publicatie interdictie doen zall dat nijemant opte voorschreven gemeente middelre tijt geen beesten slaen sall opte verbeurte van telcke reijse zes karolus gulden.

Zijn mede geresolveert dat Henrick Janss deesen aenstaende somer den torff voorde borgers opte borger gemeente naeden orbaer graven zall ende dat hij oick vuijt dzelve gemeente behoirlicke maete graven zall.