Ende dat hij mede voor nijemants graven zall moegen dan alleenlick die borgers zijn vermoegens deeser stede ordonnantie ende dat alle die borgers die daerop graven willen gehouden zullen zijn tgelt vant graven te betaelen voor midweij ofte dat zij bij faulte vandien inde eerste lotinge niet en zullen moegen comen ende gelijcke well gehouden zijn te betaelen.

Item es ter zelver tijt noch geresolveert, dat den cameraer borgemeester deese toecomende somer tot behoeve vanden stadt doen graven zall opte borger gemeente twee schepen torffs.

Is mede geresolveert dat men die collick aen de verkens gemeent voorde Berchpoirt laeten zall ende dat de cameraer de rijs copen zall om dzelve aff te doen tuijnen ende die daer begeert deur te vaeren, dat dzelve t’hairen costen daer een hecken doen setten zullen.

Opten 15^en aprilis 1589 presentibus Peter Vastrick, substituijt schoudt, Herman Scharpinck ende Cornelis Thoniss Budding, borgemeesters, Dirck Vonck, Henrick van Eck, Pelgrom Corneliss ende Rochus van Dulcken, schepenen, Gerrit Vastrick, Arien Dircxs, Jeriphaes van Triest, Gerrit Keijser, Walraven Corneliss Ringell, Claes van Schoonhoven ende Evert Nijssen, raiden, es eendrachtelicken geresolveert als hier nae volcht.