die licht deur de stadt muir scheppen dzelve raempten ende gaten toe te metselen opte verbeurte van dartich stuvers.
Zijn voirts geresolveert, dat alle de geene die opte stadts bogen getimmert hebben gehouden zullen weesen dzelve bogen tot haerluijder costen te repareren ende te onderhouden ofte binnen den tijt van zes weecken dvoorschreven boghen truijmen opte verbeurte van zes karolus guldens.
Zijn noch geresolveert opte petitie van mijn edele heeren Staten slants van Utrecht beroerende die augmentatie vanden generael middelen te weeten op ijder ton biers die de tappers slijten 6 stuvers noch twee stuvers op ijder ton biers ende bierdicks binnen off buijten landts gebrouwen, zoe well die de tappers als die borgers ende inwoonders inleggen zullen.
Item op elcke can wijns, zoe Rijnsche, Fransche als Spaensche wijns een stuver.
Item een loop zauts zes stuvers ende dit all boven tgundt daerop jegenwoirdich staet, dat men dzelve alhier binnen Rhenen mede in traijn zall brengen bij zoe verre dvoorschreven petitie bijde stadt ende steden van Utrecht mede in traijn gebrocht zall zijn ende anders niet.
Item es mede geresolveert datter dit jegenwoirdige jaer 13 lothen zullen vuijt gaen boven die acht schaeren die daerop beleent zijn.