Wi stathouder, schout, burghermeester, scepen ende ghemeen raet der poert van Wijc laten weten allen den ghenen die desen brief zullen sien off hueren lesen, dat wij concenteren, overdraghen, belieft ende overghegheven hebben, als dat die gheselscap van den jonghen schutten ghemeenlijc hebben ende houden sullen alsulke rechten ende voirwaerden als hiernae bescreven staen. Item soe wie dat in deser schutterien wesen wilt die sal den coninc ende dien twe oudermanss dat te kennen geven. Ende sij sullen hem voert bespreken metten ghemenen ghesellen. Item soe wien dat sij aennemen in ’t gheselscap die sal enen gancachtighen boghe hebben met alle sinen toebehueren. Item sij sullen alle jaer enen kovel laten maken ende dien sullen sij oppet hooft hebben opten selven dach also sij ghemeenlijc in den doelen onverdraghen sullen alle jaer. Item soe wie dat sijn kovel niet oppet hooft en hadde opten dach alsoet overdraghen is in den doelen, die soude metten eersten verbueren een oude leuwe ende des anderen daghes noch also vele ende all daghe voert dobbeleren dan der tijt toe dat hij sijn kovel hadde.
Item soe wie dat sijn schut kovel yement oppet hoeft liet draghen binnen jaers ende dat men dat bevonde metter waerheit, die verbuerde enen ouden braspennic. Item soe wie sijn kovel yement gave eer men die niewe kovelen ghemeinlijc had die verbuerde een braspennic. Item soe welken tijt onser scutten bode ghebied in den doelen te comen hetsij met kovel of met boghe ende en koomt hij in den doelen also niet hij gheboden was, hij iss sij boeten sculdich een oude leuwe. Item soe wie dat in den doelen niet en koemt binnen der uuren also he gheboden was ende die clocke anderwerf slaet ende die ure uut is, hij verbuert sijn boeten een oude leuwe. Item ghinc onser ghesellen enich uuter poert ende hij in der doelen gheboden weer sonder 

oerlof van den coninc ende den tween oudermans, hij waer boet sculdich enen lely cromsteert; oft en konde hij den coninc ende die twee oudermanss niet thuys vijnden soes al hij oerloff bidden aen drie van sinen ghesellen. Item soe wanneer onss bode gaet bieden in den doelen te comen ende dat hij die schutts niet thuys en vijt, hij sal enen boghe met krijt op die duere scriven, daermet sijn sij gheboden, soe verbueren sij huer boeten en comen sij niet also ver alsij binnen der poerten sijn. Item waer der iement die uut onser schutterijen gaen woude, die sal een lb.[1] was betalen den oudermans oft men sal ’t hem metten recht uutpanden. Item wij sullen alle jaer in den doelen overdraghen soe wanneer dat wij ons papegay schieten sullen ende dan sullen wij komen ende wachten onser loten; soe wanneer wij ghescoten hebben dan sullen wij ons oudermans kiesen voir den maeltijt. Dan sullen wij enen mijnliken maeltijt met mallicanderen eten. Ende des anderen daghes dan sullen wij bij den coninc ende bij die oudermans comen ende hueren dan die rekeninghe, wat dan den onkost beloept van den helen jaer, daer sal comen die wil. Item dan sal een ieghelijc dat sijn betalen dat hij sculdich is binnen twelf daghen oft men sal ’t hem uutpanden sonder vertrec. Item soe wie dat pande weringe doet deen sal men dat afnemen ghelijc ’t hiernae ghescreven staet. Item soes al die coninc ende die twee oudermans tot elken maele van den vier hoechtiden een menghelen wijns laten halen daer die oudermans willen. Item of ’t sake waer dat ons heer God sinen wil daermet dade ende datter enich van onsen schutten storve, daer souden die ouwermans den boghe halen totter ghesellen behoef met allen sinen toebehoren die daer weer oft die vrunden die muchten quiten voir enen halven Johannes Beyersghe gulden. Item die ghesellen ghemeinlijc van den jonghen schutten die sullen des 

iersten maendaghes naedat men den doden graeft begaen. Item men sal den bode die ghemeen ghesellen laten bieden, ende soo wie dat versuymt ende niet en coemt also hij op dien tijt gheboden is, die sal men boeten enen ouden Vleemschen.
Ende wij scout, burghermeesters, scepen, ghemeen gherecht voirscreven aldus ende in alre manieren voirscreven gheven wij van der poert weghen ende hebben ghegeven den coninc ende den oudermans voirscreven in elker tijt volcomen macht, allen boeten ende penen die te panden ende rechteovert in te winnen van den ghenen die se verbueren ende den ghemenen ghesellen die voert te bewijsen ende ter rekeninghen te brenghen. Ende waer iement die dese boeten aldus voirscreven verbuerde ende pande weringhen daerop dede, die verbuerde ellicx daghes die helfte meer ter tijt toe dat hij die boeten betaelt hadde. Ende gheviel hier enighe saken die hier niet bescreven en staen, daer sal die coninc metten oudermans een ghemeen ommevraghen affvraghen, ende nae goetduncken der meester meenichten soes al dat heengaen. Uutgescheiden alle arghelist in elken puncte bijsunder. In orconde der waerheit dat wij stathouder, burghermeesteren, scepen ende ghemeen raet der poirten van Wijck willen dat alle dese punten voircreven vorwarden past ende stade ghehouden weerden sullen, soe hebben wij onser poerten van Wijck groten zeghel aen desen brief ghehanghen. Ghegeven in ’t jaer ons heren dusent vierhondert drie ende veertich op ten seventienden dach van meymaent.