Alle den ghenen die desen brieff zullen sien of horen lesen doe ic verstaen Johan van Rynensteyn, ridder, dat ic verkoft heb minen liven heer heren Willem heer van Apcoude ende van Duersteden enen rijn ghelegen in den kerspel van Coeten ende die ghelegen is voer drie mergen lants allanghes streckende aen den Rijn, daer boven naeste ghelant is Ghijsbert van der Cule ende beneden is naest gelant die doemproest van Utrecht, om een zeker somme van ghelde die hi mi wel betaelt heeft tot minen will ende hebbe voert gheloeft ende gheloeven in goeden trouwen voer mi ende voer minen erfgenamen dat ic minen lieven heer van Apcoude voerseit of sinen erfgenamen, ombreke sijns, in den voerseiden rijn alsoe als hi ghelegen is te verstighen voer den doemproest van Utrecht, daer ic den voersiden rijn of houde, soe wanneer dat ick vermaent werde van minen lieven heer voerscreven of van erfghenamen mijne liefe heer van Apcoude voerscreven tot eenre ghenoemder scat daer ic voer den doemproest van Utrecht voerscreven veilich comen mach sonder arghelist. In oerkonde des briefs besegelt mit mynen segel. Ghegheven in ’t jaer ons Heren dusent driehondert twe ende tneghentich op Sinte Simon Juden dach apostolorum.