Wy Alart Spaen ende Geertrwt witlike wyff Alair Spaens voirscreven doen condt ende kenlic allen luden mit desen openen brieve voir onss ende voir onse erven dat wy mit onsen goeden wille vercofft hebben, gegeven ende opgedragen Herman Hermanssoen, Geryt Hermanssoen, gebrueders ende Jutten, oerre zuster, een kampken lands, gelegen in den kerspel van Zoelen, ter stede geheiten In Seliscamp, haldende vierdenhalven mergen luttel myn off meer ter goeder maten, dair noerdwert naist geerfft syn Rutgher van der Moelen ende Costen Lodensoen, oestwert de voerscreven Costen Lodensoen, zwtwert Aernt Dys ende westwert den Tyentwech, voer een vry eygen erve, dycvry ende thynsvry, den voerscreven coeperen te behalden ende erffliken te besitten. Ende wy vercoepers voerscreven lyen ende kennen dat wy op dit voirscreven kempken lands vertegen hebben alsoe dat wy ende onse erven claerliken ende altemale dair aff onterfft syn ende gheen recht noch toeseggen daer meer aen en hebben noch en behauden ende dat dese voerscreven coepers daer aen geerfft syn sy ende oer erven ende oeren vryen wille dair mede doen moegen sonder enich wederseggen. Voert so hebben wy vercopers voirscreven gelaifft als principale saecwaude mit gesamenderhant ende ongescheiden den voergenoemden coeperen dit voirscreven kempken lands te waren jair ende dach voir alle die ghene dies then recht comen willen als erffscoeprecht is te waren in Nederbetuwe ende allen voercommer ende voerplicht dair aff te doen. Mede so bekenne wy Alart Spaen ende Gertrwt syn wyff voirscreven dat onss ’t gelt hier aff wail betailt is den lesten penninc mitten iersten ende bedancken onss goeder betailinge. Orkonde dess bryeffs hebben wy gunsteliken onse teycken hier ain gehangen. Gegeven in ’t jair onss Heren duzent vierhondert vyer ende dartich op tes Heyligen Sacramentsavont.