Wy joffer Henric van Steenberghen, Jan van Lewen Henricsz echte wyff te wesen plach zeligher ghedachten, Hermen van Lewen Jansz, Jan van Merten Jansz ende joffer Beert, onse dochter ende suster Jans voirscreven, kennen ende lyen mit desen openen brieve voir ons ende voir onsen erven als dat wy tot enen ewighen erfpacht ghehuert hebben teghen Johan van den Steenhuysen, amptman in der Nederbetue, ende Hermen van den Steenhuysen enen camp lands mit al sulcker dyck als daer mit recht toebehoert, gheheyten den Horninxe camp, inhaldende omtrynt dertien hont lands een luttel myn off meer ter goeder maten, alsoe als die geleghen is mit al sinen toebehoren in der maelscap van Ravenzwade, streckende mit der overster syde aen den Koegrave toe ende mit der nederste syde aen der heeren lant van Aernhem toe, noertwert naest gelant is joncker Gherit van Culenborch, zwytwert naest gelant is die Brede meer ende wy ende onse erfghenamen Johan van den Steenhuyse ende Hermen van den Steenhuysen voirscreven off hoir erven gebraek hoerre then ewighen daghen jaerlix te pacht ende in rechter huyrringhe aff gheven ende wtreyken sullen twe alde Francrixsche schilde off ander goet payment daer voir in gelycker weerden in der tyt der betalinghe desen voirscreven pacht alle jaer te betalen in hoir vry zeker behout. Sonder enighen onraet daer aff te gelden op Sunte Petronellendach nu naest comende nae datum des briefs over een jaer. Ende alsoe voert van jaere te jaer, erflic, ewelic ende ummermeer. Mit voirwaerden dat wy dien dyck sullen doen dycken ende bewaren hem datter die scouwe over gheet van tyt te tyt, van jaer te jaer, erflic ende ewelic. Sonder enich wedersegghen. Ende tzyn voirwaerden waert zake als dat wy voirgenoemde persoenen off ons erven gebraek ons Johan van den Steenhuysen, 

richter, ende Hermen van den Steenhuyse voirscreven, off hoir erven gebraecks harre desen vurscreven pacht alle jaer niet en betaelden op den voirgenoemden taeldach, soe bekennen wy mit desen selven brieve voir ons ende voir onsen erven Johan van den Steenhuysen, amptman in Nederbetue, ende Hermen van den Steenhuysen voirscreven, off hoir erven, gebraek haerre, then ewighen daghen vervallen te wesen van allen rechts ende toesegghens dat wy hebben off hebben moghen aen desen vorscreven camp lants in enygherwys. Ende en zullen daer niet teghen segghen doe noch doen doen mit ghenen rechten hoghe ofte leghe. In gheenderwys wtgenomen al argelist. In kennisse der waerheyt soe hebben wy voirscreven persoenen onse zegelen ende elc bysonder aen desen brieff gehanghen. Ghegheven in ’t jaer ons Heren dusent vierhondert vyve ende vyftich op onser lieven vrouwenavont conceptio.