Wy Johan van den Steenhuyse, amptman in Nederbetue, ende Herman van den Steenhuyse kenne ende lyen mit desen opene brieve voir ons ende voir onse erve dat wy vytgegeve hebben mit onsen vryen wille Herman van Lewen Janssoin off sine erve, weer hy niet, in enen erffpacht enen camp lands geheiten den Hornincxskamp, haldende omtrint dertien hont lands een luttel meer off myn, ter gueder maten, alsoe die dair gelegen is mit al sinen tobehoren, gelegen in der maelscappen van Ravenswade, streckende mitter overste side in den Koegrave toe ende mit der nederste side ander heren lant van Arnhem toe, noertwart naest gelant is joncheer Gerit van Culenborch, zuytwairt die Brede meer, voir twe alde Vrancryxe scilde sjairs, erfflich ende ewelich te gebruken alle jair desen voirscreven pacht ons off onsen erve, gebreeck onser, te betalen commervry in ons seker behout op Sunte Peternellendach nu neest comende, nae datum ‘s briefs over een jair ende also voirt van jair te jair, erflich ende ewelich op den voirscreven taeldach. Ende weert saick dat Herman voirscreven off sine erven, weer hij niet, ons Johan van den Steenhuyse ende Herman van den Steenhuysse voirscreven, off onsen erve, gebreeck onser, desen voirscreven pacht niet en betaelden alle jaer op ten voirscreven taeldach, soe is Herman voirscreven vervallen ende sine erven van allen rechts ende toeseggen als hy dair aen heeft off hebben mach in ennigerwys sonder ennich wederseggen, ende Herman van Lewen voirscreven off sine erve, weer hy niet, sullen verwaeren mit vurwerden alsulke dyck ten ewigen daigen als mit recht op dit voirscreven erve behoirt ende die scouwe van tyt tot tyt van jair te jair over te leveren ende te dycken 

op sinen cost op die voirscreven peen sonder ennige onraet ons off onse erven dair aff te gelden ende sonder ennige vermynre ons pachts voirscreven, vytgenomen alle argelist. In kennisse ende in orconde der wairheit soe hebben wy Johan van den Steenhuys ende Herman van den Steenhuys voirscreven onse segelen an desen brief gehangen. Gegeven in ’t jair ons Heren dusent vierhondert vyff ende vyfftich op onser vrouwenavont conceptione.