Allen den ghenen die desen brieff zullen syen off hoiren lesen doen wy verstaen joffer Heinric van Steenberghen, Jan van Lewen Heinricxs zoen echte wyff te wesen plach, zeligher ghedachten, Hermen van Lewen Jansz, Jan van Merten Jansz ende joffer Beert Jan van Lewen Henricxsz dochter voirscreven, kennen ende lyen mit desen openen brieve voir ons ende voir onsen erven als dat wy vercoft hebben mit onsen vryen moetwille, mit gezamender hant Dirck Loeff ende sinen erven die beterscap van eenen camp lands ende erfs inhaldende omtrent dartien hont lands een luttel myn off meer ter goeder maten, alsoe als die gheleghen is mit al sinen toebehoiren in der maelscap van Ravenszwade, gheheyten den Hornincxszcamp, streckende van myns jonckeren lant van Culenborch voert op aen die Brede meer toe, daer boven naest gelant is der Buerweteringhe, gheheyten den Koegrave, ende daer beneden naest gelant syn die heren van Aernhem om een somme van gelde welcke somme gels ons Dirc Loeff voirgenoemd witteliken vol ende al wael betaelt heeft tot vryen wil den lesten penninc mit den iersten dats ons ghemecht. Ende bedancken hem ende sinen erven daer off alle goeder betalinghe. Voert soe gheloven wy voirgenoemde persoenen voir ons ende voir onsen erven mit gezamender hant elcxs onser een voir al Dirck Loeff voirgenoemd off sinen erven gebraeck syns off den helder des briefs mit sinen wil die beterscap van desen voirscreven camp lands te waren voir een vry eyghen goet ende erve ende een ewich erfwaer te wesen als erfcoeprecht is in Nederbetue. Ende al hynder ende voircommer daer off te doen voir allen den ghenen die des then rechten commen willen ende mede daer op doen te vertyen alle die ghene die daer mit recht op sculdich syn te vertyen waert zake dat Dirc Loeff voirscreven off syn erven gebraeck syns off den helder des briefs niet quam wy hier by tot enigher tyt enighen hynder ofte aenspraec by creghe ofte lede 

in enigher wys dien schaede geloven wy hem altoes op te richten ende te betalen tot syns selfs simpel seghen sonder enich […] ende wy voirgenoemde persoenen off onsen erven gebraeck onsser sullen mit Dirc Loeff voirgenoemd off sinen erven gebraeck syns off mit den helder des briefs […] wile verwaren jaerlixs alsulcken dach als daer mit recht op hoert sonder enich weder segghen. Ende sint voirwerden als dat wy voirgenoemde persoenen off onsen erven gebraeck onser teghen Dirc Loeff voirgenoemd off sinen erven gebraeck syner off den helder des briefs niet […] copen ende lossen moghen die beterscap van desen camp lands mit twyntich alde Vrancrixschen schilde ander halven Rynsche gulden gerekent voir elcken schilt off ander goet payment daer voir in gelycker […] als op Sunte Lambertsdach nu naest comende na datum des briefs over een jaer ende niet langher. Ende weert zake als dat wy voirgenoemde persoenen off onsen erven, gebraeck onser, dan die beterscap van desen voirscreven camp lande teghen Dirc Loeff voirscreven off sinen erven, gebraeck syns, off den helder des briefs niet [….] wil niet en loesten gelyc voirgenoemd steet, soe syn wy ende onsen erven then ewighen daghen vervallen van allen rechts ende toesegghens als wy aen die beterscap des voirscreven camp lands hebben in enigher wyse. Ende dan soe sullen wy den voirscreven camp lands zementlic bruyken ende bouwen halff ende halff. Noch sint voirwerden wert zake dat wy voirscreven persoenen off onsen erven, gebraeck onser, die twe alde 

Vrancrixsche schilde jaerlyckse reynten die ons amptman Johan van den Steenhwisen heeft wt den voirscreven camp lands niet en betaelden alle jaer als op Sunte Walburgsdach, welcke men heyt den meydach nu naest comende na datum des briefs, soe syn wy ende onsen erven then ewighen daghen vervallen van allen rechts ende toesegghens als wy off onsen erven hebben van alinghe den voirscreven camp lants ende en sullen ons des tot ghenen daghen onderwynden ende Dirc Loeff voirscreven off syn erven, gebraeck syns, off den helder des briefs niet [….] wil, sal en mach dan so men oerbaer doen mit alinghe des voirscreven camp lands ombecroent van ons ende van onsen erven. Ende sint voirwaerwaerden waert zake als dat desen brieff tot enigher tyt gaterich, blockich, [….] off nat worde off dat hy gebrec hadde in […] in letteren off oeck in woerden off datter aen gebraec off te braec ene zegel off meer zegelen des en sal desen selven brieff te [….] wesen mer hy sal selve tyt [….] ende weten in synre volcomender machten in der selver formen off hy gave ghene ende oeck al wael bezegelt waer mit helen zegelen. […] ons zegelen van weerden then ewighen daghen te halden wt genomen al argelist. Des altemael tot enen rechten orconde der waerheyd soe hebben wy onse zegelen voir ons ende voir onsen erven joffer Henric, Hermen, Jan ende Beert voirscreven aen desen brieff gehanghen. Ghegeven in den jaren ons Heren dusent vierhondert soeven ende vyftich op Sunte Valtentynsdach martelaer.