Wy Alert Loeff ende Lysbet Alers voirscreven echte wyff kennen ende lyen myt desen openen brieve voir ons ende voir onsen erven als dat wy vercoft hebben Willem Belinc ende Mergriet syn echte wyff enen alden Vrancrixsche schilt tsjaers wt enen acker lands gheheyten den Breden Acker, geleghen over die Broecsteghe, daer boven naest gelant is Willem van der Woerde Willemsz, beneden die heer van Egmont. Alle jaer te betalen op Sinte Walburgisdach welck men heyt den meydach nu naest comende na datum des briefs. Ende alsoe voert van jaer te jaer erflic ende ewelic op ten voirscreven taeldach. Wert zake dat wy des nyet en deden, soe moghen Willem ende Mergriet voirscreven off haer erven, gebraeck harre, ons desen voirscreven Vrancrixsche schilt wt peynden mit enen gezworen pernder gelyc erfpacht wtgenomen al argelist. In kennisse der waerheit soe hebben wy Alert Loeff ende Lysbet voirscreven onse zegelen aen desen brieff ghehangen. Ghegeven in ’t jaer ons Heren dusent vierhondert acht ende vyftich op Sinte Valentynsdach martelaer.