Wy Jacop Peterssoen, richter, Reynolt van Wyck ende Jan Henricksoen, borgermeisteren der stadt Wyck in der tyt oerkonden ende tugen mit desen tegenwoerdigen brieff dat ons kenlick is dat Hillegont Willem Dirck Heynricksz wedue mit allen recht vervolcht ende verwonnen heeft mit pandingen ende mit scyeringe ende mit [...] pandinge [...] ende willecoeren der stadt van Wyck op Willem van Poelwyck ende Fye siin echte wyff alse van acht Postulaetsche guldens hoeftgelts vyftien stuvers voer den gulden gerekent ende den derden penninck meer daer die som off maeckt twaleff Postulaetsche gulden ende enen Postulaetschen gudlen tot [...] daer Hillegont ende haer eerffgenamen renten voerscreven [..] siin wt dat eyndstraets van die Nypoert dat gaet daer deyl[....] daer die stadt van Wyck [...] jaerlix off [...] wt is wtreykende vyftien stuvers current die sy te voren had wt een hofstadt die onse genedige heer betymmert ende beheynt heeft ende daer siin genaden dat eyndestraets voer wtgeslagen hebben den penninck voer sestien dat beloept aen eerffrente jaerlix twaleff stuvers ende negen deutkens die Hillegont ende haer eerffgenamen jaerlix [...] sellen weesen wt dat eynde straets van der stadt van Wyck op Sunt Victoersdach off binnen veertien dagen daernaest volgende ombegrepen. Off Hillegont ende haer eerfnaemen voerscreven sellen 't na den termyn panden als recht is [...] tegen der stadt van Wyck welke pandinge ende scyeringe ons Hillegont geboden heeft off wy die aen ons nemen wouden tot onser stadt behoeff des wy nyet doen en wouden maer wy hebben se haer te goede gescouden behouden een ygelyck siins rechts. In oerkond des brieffs ende der waerheit so hebben wy schout ende borgermeisters voergenoemt onse eygen zegelen wthangende aen desen brieff gedaen. Gegeven ende gesciet in den jaren ons Heeren duusent vier hondert vier ende tachtentich op ten vierden dach in der maent geheten in Latyn octobris.