Wy meister Jan van Merten, richter, Jan Henricksz ende Peter die Roey, scepen tot Wyck, doen kont allen luden dat voer ons quamen in ’t recht Roeloff Harmanssoen, Jacop ende Jan, gebroederen, Jan van der Muer ende Dryes van der Scuer ende droegen op ende gaven over mit oerdel ende vonniss alsoe die scepen wysden dat recht was dat capittel ende der kerken tot Wyck achtyen stuvers jaerliceschen eerffrenten gaende wt der huusinge ende hofstede gelegen binnen Wyck nae vermogen des brieff daer desen tegenwoerdigen brieff doer is getransfixiert. Ende dat capittel tot Wyck sal van dese achtyen stuvers heffen ende boren jaerlicx ten ewygen dagen toe tyen stuvers voer zalige Coman Harman ende syn wyff memory ende die ander acht stuvers sal hebben ende boren die kerck tot Wyck. Ende Roeloff, Jacop ende Jan, gebroeders Jan van der Muer ende Dries van der Scuer vertegen ter selver tyt mede op dese eerffrenten tot behoeffs des capittels ende der kerken tot Wyck. Ende sy geloeffdense mede te vryen ende te waren jaer ende dach nae eerffrentenrecht also dat die scepen wesen voer recht dat Roeloff, Jacop, Jan ende Jan mit Dryes ende haer eerffnamen van dese eerffrenten onteerft siin ende dat het capittel aen den tyen stuvers ende die kerck tot Wyck aen den acht stuvers eerffrenten sullen blyven geerft mitten recht. Sonder al argelis, behiltelick onsen heer van Wyck syns rechts. In kenniss der waerheit bezegelt mit onsen zegelen. Gegeven in ’t jaer onses Heren dusent vierhondert vyer endetnegentich des donredages nae Sunt Katerynen dach virginis.