Alle den genen die desen brieff sellen sien off horen lesen doe ick verstaen Willem Aelbertsz ende lye ende bekenne voir my ende voir mynen erven dat ick een husinge ende hofstede gecoft heb tegen Cornelisz mynen zwager, gelegen in die Nypoert, begrepen ende bepaelt nae wtwisinge des coepmansbrieff die my Cornelis Willemsz, mynen zwager voirscreven, dair off gegeven heeft, inhoudende op enen gouden Rynsch gulden tsjaers losrenten te betalen jairlicx dat cloester binnen Wyck in die heilige dage van Paesschen ende op enen Rynsch gulden current te betalen Sunte Lambert meister Henrick Aerssoen nae vermoegen synre zegell ende brieff. Mit sulker voirwairden wair ’t sake dat Willem Aelbertsz ofte syn eerfgenamen voirscreven niet en betaelden op ten terminen voirscreven, soe wess hynder, scade off gebreck Coirnelis Willemsz ofte syn erfgenamen voirscreven dair off cregen ende leden dat sullen sy weder om verhalen aen Willem Aelbertsz voirscreven husinge ende hofstede, ende mede aen alle dat geen dat Willem voirscreven nu tyt heeft in den gericht van Wyck. Ofte dat hy ofte syn erfgenamen naemaels crygen moegen, ende den scade op richten tot haren simpelen woirden sonder ede dair off te nemen ende hem dair niet tegen te weren mit genen rechte, geestelick noch weerlick. Sonder argelist. Des tot enen oerkonde soe heb ick Willem Aelbertsz voirscreven gebeden den eersamenen mannen meister Heinrick Aerntsz ende Hermen Jansz desen brieff over my te bezegelen, want ick op dese tyt selve geen zegell en gebruke, twelck wy Heinric ende Hermen gaern gedaen hebben ter bede Willems voirscreven ende hebben onse zegelen aen desen brieff gehangen. Gegeven in ’t jair ons Heren vyftienhondert ende drie op Alre Heiligenavont.