verbeurte van eenen karolus gulden, zoe dickwils als ijmant bevonden wordt contrarie gedaen te hebben ende die binnen Rhenen comen brouwen, geen borgers zijnde, zullen van elke ton biers te gruijt betalen een halffve stuver op peijne dat dzelve telcke reijse verbeuren zullen een karolus gulden ende effen well gehouden zullen zijn dvoorschreven gruijt te betalen.
Item, dat die tappers geen bier offe brouwers geen bier mette ton minder offe meerder maten vuijt noch inslaen zullen moegen ofte zij hebben tzelve den pachters eerst te kennen gegeven ende een ceelken daer aff ontfangen opte verbeurte van telcke reijse zes karolus gulden ende in zoeverre die brouwers offe tappers de pachters niet thuijs en vonden om een ceelken te ontfangen, zullen zijluijden die aenbrenginge doen ende zulcx te kennen geven aenden naeste naebuiren daermede zijluijden alsdan zullen moegen volstaen.
Item zullen die tappers ende biervercopers die eenige bieren aenden tappers vuijtslaen gehouden zijn tallen tijden tot vermaeninge vanden pachters vanden accijsen offe collecteurs bij ede te verclaren hoe veell vathen biers zij getapt ende aenden tappers gelevert hebben opte verbeurte van zess karolus gulden.