Wilhelm bij der gratie Godes prince van Oraengien, grave van Nassau, etc. stadhouder, de presiderende ende raden 's hooffs van Utrecht, doen cond allen luijden dat op huijden date deses ons de heere ende meester Cornelis Booth, raedt in denselven hove, vertoont heeft sekere oude francijne brieff gegeven in 't jaer ons Heeren dusent vierhondert vijff en tsestich des dinsdages na Sinte Aechtendach, sijnde een vidimusbrieff der stadt Utrecht, continerende dat voor schout ende schepenen derselver stadt Willam Folpaertssoon vertoont hadde eenen stadtbrieff gansch ende gave, besegelt met het groot segel der voorschreven stadt, sprekende van woorde tot woorde als volght: Alle den genen die desen brief sellen sien of horen lesen doe wij verstaen scoute ende scepene der stat van Utrecht dat voir ons quamen in 't gerechte Willem Foeijt, Thonijs Foeijt ende Huge Foeijt, gebrueders, ende aldaer so belijeden alse Willam Foeijt voirscreven voir hem ende voir Anen, sinen wive, Thonijs Foeijt voir hem ende voir Nellen sinen wive, ende Huge Foeijt voir hem ende voir Alijden sinen wive, daer sij elx tot dier tijt wittelicke boerte bij hadden, ende sij belijeden alle mit gesamenderhant alse recht wijsde, also dat sij mit malcander gedeijlt ende geloet hadden alle alsulke goede ende renten alse hem aengecomen ende bestorven waren van dode Folpaert Foeijten hoers vaders saliger gedachten ende hier nabescreven staen. In den eersten so is Willam voirseijt mitten rechten lote gevallen die husinge ende hofstede gelegen aen 't oude kerchoff daer Folpaert Foeijt voirseijt in te wonen plach. Ende hiertoe noch zes ende dertich pont 's jaers erfrenten aen der stat van Utrecht voirscreven in enen brief. Ende Thonijs Foeijt voirscreven is mitten rechten lote gevallen in den eersten den vrijen eijgendom van vier pont 's jaers erfrenten stat paeij voirseijt 

uter husinge ende hofstede gelegen in de Vuijlstege ende Claes Jacopssoen in erffpacht heeft op versuijm. Ende noch uter selver husinge ende hofstede voirseijt tijen scillinge stat paeij ende vier loot zulvers 's jaers erfrenten. Ende daertoe noch den vrijen eijgendom van twe pont stat paeij 's jaers erfrenten uter husinge ende hofstede gelegen in de Vuijlstege ende Aelbert Beijnop in erfpacht heeft op verzuijm. Item noch daertoe den vrijen eijgendom van twe loot zulvers 's jaers erfrenten uter husinge ende hofstede gelegen in de Gortstege ende Jan Dircssoen die gespmaker in erfpacht heeft. Item noch den vrijen eijgendom van twe loot zulvers 's jaers erfrenten wt eenre husinge ende hofstede gelegen in der Gortstege voirscreve ende Mouwerys Peterssoen die sceymaker in erfpacht heeft. Item hiertoe noch zeven pont erfrenten 's jaers aen der stat van Utrecht. Ende Huge Foeijt voirgenoemt is mitten rechten lote gevallen in den eersten vijf Wilhelmus scilde 's jaers erfrenten uter husinge ende hofstede geheten Cleijn Hasenberch ende Ghijsbert Thomaessoen in erfpachte heeft. Ende daertoe een husinge ende hofstede gelegen in der Vuylstege daer Lobbegen Beynops mit horen kijnderen oestwert ende Aelbert Beijnop voirseyt westwaert naestgelegen sijn. Item hiertoe die helfte van eenre husinge ende hofstede gelegen op ten hoeck van de Vuylstege daer Willam Foeyt voirscreven die wederhelft of toebehoirt. Ende vertegen daeroff mit hande voirscreven die een op ten anderen ende elc tot des anders behoef van alle alsulke goede ende renten als een ygelic daerof mitten rechten lote gevallen is ende hier bescreven staen. Ende sij geloefden malcanderen mede mit hande voirscreven alle die voirscreven goede ende renten als elc mitten rechten lote gevallen is ende voirscreven staen jaer ende dach te waren na Sinte Lambertsdach naestcomende. Ende alle voirplechten of te doen. Dit geschyede onder Johan van Oudewater, scoute, Adryaen van Lantscroen, Johan Sloyer, Jacob van Amerongen

Johan over de Vecht, Philips van Gonevelt, Braem van Lichtenberch ende van Lantscroen, Dirck van Zulen, Weernaer Braem, Willam van Snellenberch, Jacob van Jutfaes, Johan van Blochoven ende Goedscalc van Brakell, scepene te Utrecht. Ende op dat dit vaste ende stade blive so hebben wij scoute ende scepene voirgenoemde onser stat segell aen desen brief gedaen t'enen oirconde. Deser brieve sijn drie gegeven in 't jaer ons Heren dusent vierhondert twe ende tsestich des donredages na Sinte Petersdach ad Vincula. Was den voorschreven brieff besegelt met het groote segel der stadt Utrecht aen onder uijthangende steerte. Van welcken brieff de voornoemde heere Booth aen ons versocht heeft onse brieven van vidimus die wij hem gegonst hebben ende gonnen mitsdesen. Oircond 't segel van justitie van den voorschreven hove hieronder aen doen hangen op den 22e junij anno 1600 vijftich.